ქართული English
კონტრტერორისტული ცენტრის უფროსი – სახელმწიფო დეპარტამენტის ანგარიშში ნათქვამია, რომ საქართველოს ტერიტორიაზე საგრძნობლად იკლო „ისლამური სახელმწიფოს“ მხარდამჭერთა რიცხვმა

კონტრტერორისტული ცენტრის უფროსი – სახელმწიფო დეპარტამენტის ანგარიშში ნათქვამია, რომ საქართველოს ტერიტორიაზე საგრძნობლად იკლო „ისლამური სახელმწიფოს“ მხარდამჭერთა რიცხვმა

„აშშ-ის სახელმწიფო დეპარტამენტის ანგარიშში ნათქვამია, რომ საქართველოს ტერიტორიაზე საგრძნობლად იკლო „ისლამური სახელმწიფოს“ მხარდამჭერთა რიცხვმა“, – ამის შესახებ სახელმწიფო უსაფრთხოების სამსახურის კონტრტერორისტული ცენტრის უფროსმა ირაკლი ჩიმაკაძემ განაცხადა, რითაც გამოეხმაურა ტერორიზმის შესახებ ამერიკის სახელმწიფო დეპარტამენტის ანგარიშს. ჩიმაკაძის განცხადებით, ანგარიშში, ასევე ნათქვამია, რომ საქართველოს სახელმწიფო უსაფრთხოების სამსახურის მიერ ჩატარებული სპეცოპერაციის შედეგად გამოვლინდა და ლიკვიდირებულია ტერორისტული ორგანიზაცია „ისლამური სახელმწიფოს“ აქტიური წევრი ახმედ ჩატაევი.

„სახელმწიფო დეპარტამენტის მიერ გამოქვეყნებულ ანგარიშში ნათქვამია, რომ საქართველოს სახელმწიფო უსაფრთხოების სამსახური არის წამყვანი უწყება ტერორიზმთან დაკავშირებული ინციდენტების რეაგირების კუთხით, შესწევს უნარი მოახდინოს აღნიშნული დანაშაულების დროული გამოვლენა და აღკვეთა. ტერორისტული ორგანიზაცია „ისლამური სახელმწიფოს“ წინააღმდეგ მებრძოლ გლობალური კოალიციის შექმნისთანავე, საქართველო შეუერთდა აღნიშნულ კოალიციას, მისი აქტიური წევრი გახდა და აშშ-სთან ერთად ტერორიზმთან დაკავშირებულ მთელ რიგ საკითხებზე ვმუშაობთ.

ანგარიშში ასევე ნათქვამია, რომ საქართველოს სუს-ის მიერ ჩატარებული კონტრტერორისტული ოპერაციის შედეგად გამოვლინდა და ლიკვიდირებულ იქნა ტერორისტული ორგანიზაციის „ისლამური სახელმწიფოს“ აქტიური წევრი ახმედ ჩატაევი. თბილისსა და პანკისში გატარებული ღონისძიებების შედეგად, ასევე დაკავებულია 8 პირი, რომლებიც უშუალოდ იყვნენ დაკავშირებული აღნიშნულ დაჯგუფებასთან. ყველა პირის მიმართ გამამტყუნებელი განაჩენი დადგა.

ანგარიშში, ასევე, ნათქვამია, რომ საქართველოს ტერიტორიაზე საგრძნობლად იკლო „ისლამური სახელმწიფოს“ მხარდამჭერთა რიცხვმა,“ – განაცხადა ჩიმაკაძემ.

შეგახსენებთ, ამერიკის შეერთებული შტატების სახელმწიფო დეპარტამენტმა ტერორიზმის შესახებ 2018 წლის ანგარიში გამოაქვეყნა. ყოველწლიურ ანგარიშში მსოფლიოს სხვადასხვა ქვეყნებთან ერთად, შეფასებულია საქართველოს მიერ განხორციელებული ღონისძიებები ტერორიზმის წინააღმდეგ ბრძოლის კუთხით. აშშ-ს სახელმწიფო დეპარტამენტის ანგარიშში საქართველოს სახელმწიფო უსაფრთხოების სამსახური ტერორიზმის წინააღმდეგ ბრძოლის სფეროში წამყვან უწყებად დასახელდა.

წყარო: interpressnews.ge

კომენტარის დატოვება

არ დატოვთ სავალდებულო ველები შეუვსებელი *

*