“მოძრაობა სამართლიანი საქართველოსთვის” და რუსეთის მმართველ პარტია “ედინაია როსიას” შორის თანამშრომლობის შესახებ შეთანხმება 9 თებერვალს მოსკოვში გაფორმდება.
ზურაბ ნოღაიდელის პარტიის პრესსამსახურის ინფორმაციით, ხელშეკრულებას “ედინაია როსიას” სახელით ბორის გრიზლოვი და მოძრაობის ლიდერი ზურაბ ნოღაიდელი მოაწერენ ხელს.
ექსპრემიერი მოსკოვში 8 თებერვალს მიუნჰენიდან ჩავა, სადაც ერთდღიანი ვიზიტით 7 თებერვალს გაემგზავრება. მიუნჰენსა და მოსკოვში ნოღაიდელი არაერთ საქმიან ვიზიტს გეგმავს.
რაც შეეხება “ედინაია როსიასთან” შეთანხმების ტექსტს “ინტერპრესნიუსი” მას უცვლელად გთავაზობთ:
“სრულიად რუსეთის პოლიტიკური პარტია “ედინაია როსია” და “მოძრაობა სამართლიანი საქართველოსთვის”, შემდგომში მხარეებად წოდებულნი, ისწრაფვიან, შეიტანონ წვლილი საქართველოსა და რუსეთის ფედერაციას შორის კეთილმეზობლობის განმტკიცებაში. გამომდინარე იქედან, რომ პარტიათაშორისი კავშირები უნდა წარმოადგენდნენ რუსულ-ქართული ურთიერთობების მნიშვნელოვან შემადგენელ ნაწილს და მოწოდებულია, ხელი შეუწყოს მათ ნორმალიზებას, ეფუძნება რა დამოუკიდებლობის, თვითმყოფადობის, ურთიერთპატივიცემის, ერთმანეთის საქმეებში ჩაურევლობის, თანასწორობის და პარტნიორობის პრინციპებს, შეთანხმდნენ შემდეგზე:
1. მხარეებს ექნებათ კონსულტაციები და გაცვლიან ინფორმაციებს რუსეთის ფედერაციასა და საქართველოში არსებულ აქტუალურ, ორმხრივ და საერთაშორისო საკითხებზე, გააცნობენ ერთმანეთს საკუთარ გამოცდილებას: პარტიული მშენებლობის, საორგანიზაციო მუშაობის, საკონტროლო-სარევიზიო საქმიანობის, კადრების სწავლებისა და მომზადების, საგამომცემლო საქმიანობის, საკანონმდებლო და აღმასრულებელი ორგანოების საქმიანობაში მონაწილეობის მიღების, ახალგაზრდული პოლიტიკის, საერთაშორისო კავშირების და სხვა სფეროებში, რომლებიც საერთო ინტერესს წარმოადგენს.
2. მხარეები რეგულარულად მოახდენენ პარტიული დელეგაციების გაცვლას სხვადასხვა დონეებზე, გამართავენ ექსპერტებთან შეხვედრებს, ასევე, სხვა ორმხრივ ღონისძიებებს.
3. მხარეები ხელს შეუწყობენ პარტიათაშორის კავშირებს და კონტაქტებს რეგიონულ დონეზე.
4. მხარეები, თავიანთი ეგიდით, მოახდენენ ორმხრივი და მრავალმხრივი სემინარების, კონფერენციების, “მრგვალი მაგიდების” ორგანიზებას ყველაზე აქტუალურ რუსულ-ქართულ საკითხებზე და პარტიათაშორის ურთიერთობებზე, ამაში ჩაერთვება სპეციალისტების ფართო წრე და საზოგადოების წარმომადგენლები.
5. მხარეები აქტიურად შეუწყობენ ხელს კონტაქტების განვითარებას არასამთავრობო და სხვა საზოგადოებრივი ორგანიზაციების ხაზით.
6. აღნიშნული შეთანხმება ძალაში შედის ხელმოწერისთანავე.

ინტერპრესნიუსი